Talle vername landbou-organisasies en verskaffers ondersteun vanjaar se African Farmers Workshop and Expo (AFWE) wat van 12 tot 14 Augustus by die Johannesburgse eksposentrum plaasvind.
Die Black African Young Farmers Association (BAYOFA), wat hom beywer vir die erkenning van jong swart boere se sleutelrol in die landbou, beskou die werksessie en ekspo as ’n belangrike platform vir aandeelhouers om kwessies rakende gewone boere en transformasie in die sektor aan te spreek, herinner Poiho Ramotlatsi, die hoofuitvoerende beampte. “Ons wil deur die AFWE landbou-ontwikkeling en voedselsekerheid aanmoedig deur vennootskappe met maatskappye en rolspelers in die bedryf te sluit wat boere wil bystaan om toegang tot markte te verkry.”
Die internasionale groep ONE, ’n kampvegter vir die beëindiging van armoede en voorkombare siektes, veral in Afrika, steun die AFWE vanjaar as ’n vennoot in die AgriYouth Indaba. Die indaba fokus op bemagtiging en steun aan jong mense in die landbou. “Ons hoofdoelwit is bewusmaking dat die klem vanjaar op die landbou en voedselsekerheid val,” sê dr. Sipho Moyo, direkteur van die ONE-veldtog.
Die nasionale minerale-navorsingsorganisasie Mintek is ook vanjaar weer ’n borg. Talle opkomende boere kan nie bemestingstowwe bekostig nie, veral weens die vervoerkoste daarvan. Baie inheemste rotse bevat egter spoorelemente en minerale wat vir plantegroei geskik is. Mintek ondersoek hierdie rotsgesteentes se volhoubaarheid en help die plaaslike inwoners om klein verwerkingsaanlegte op te stel. “Vanjaar wil ons meer vennootskappe smee en meer besigheid in die bedryf bevorder, vertel Magaret Segole, bemarkingsassistent by Mintek.
Zoetis, die wêreld se eerste onafhanklike dieregesondheidsmaatskappy, sal weer as borg en uitstaller by die AFWE te sien wees. Zoetis sal ook verskeie opvoedkundige werksessies vir boere aanbied. Volgens Llewellyn Sinclair, die groepbemarkings- en tegniese bestuurder, sal Zoetis daagliks drie werksessies oor drie vername dierspesies aanbied: beeste en skape, varke en pluimvee. “Ons moet na ons boere omsien,” verduidelik Sinclair. “Opvoeding is 'n belangrike uitdaging in die groot kennisgaping wat oorbrug moet word.”
