Dit is waaroor die besprekings op die 22ste nasionale kongres van die Rooivleisprodusenteorganisasie (RPO) gaan wentel, sê mnr. Arnold Brand, voorsitter van die RPO. Afgevaardigdes kom op 11 September in Kaapstad byeen om oor die toekoms te besin.
Verwikkelinge in die internasionale rooivleis-arena sal deur twee uitgelese sprekers onder die loep geneem word. Hulle is mnr. Philip Seng, voorsitter en hoofbestuurder van die Amerikaanse Vleisuitvoerfederasie, en me. Erin Daley, hoof van die navorsingsafdeling van dié organisasie.
Afgevaardigdes sal deelneem aan verskeie besprekingspunte oor koste, pryse, inligting en voorligting, dieresiektes en grensbeheer. Verslae oor die bevordering van die verskillende diersoorte se vleis, veediefstal en probleemdiere sal voorgelê word.
Brand sê die persepsie dat boere meestal verantwoordelik is vir hoë voedselpryse, is totaal verkeerd en sal verander moet word. Hoë kospryse plaas 'n sosiale verantwoordelikheid op die bedryf én die owerheid om beleidsrigtings in te voer wat verligting sal bring. Vir rooivleisprodusente om met welslae 'n bydrae tot voedselsekerheid te lewer, sal kommersiële én ontwikkelende boere se potensiaal ten volle ontgin moet word.
Om voldoende produksiegroei in die toekoms te verseker, sal beduidend groter beleggings in navorsing en ontwikkeling gemaak moet word. Die bedryf kan dit nie alleen doen nie. Dit sal 'n spanpoging saam met die owerheid verg.
Om voort te gaan om gesonde rooivleis van goeie gehalte higiënies te voorsien, sal krities na bedryfstrukture gekyk moet word waarin die benadering van die volle waardeketting noodsaaklik is. As nodig, sal aanpassings gemaak moet word, sê hy.
26 Augustus 2008
