Mnr. Sandile Mkhwanazi, 'n landbouwetenskaplike wat wingerd- en wynkunde aan die Universiteit van Stellenbosch studeer het, is as die wenner van die 2014 Veritas Jong Wynskrywer-kompetisie gekroon.
Mkhwanazi meen die prettige deel van wyn is net so belangrik soos die akademiese sy daarvan “Ek het nog altyd daarvan gehou om wyn as prettige deel van die lewe te weerspieël, nie 'n akademiese studie nie,” sê hy. Hy het die paneel van beoordelaars met sy skerpsinnigheid, insig en geesdrif beïndruk.
Mkhwanazi werk tans by Elsenburg Landboukollege as assistent-wynmaker en waarnemende wingerdboukundige. Me. Daisy Knowles, wat die tweede prys losgeslaan het, is die persoonlike assistent van 'n privaatbelegger. Sy het 'n uitgebreide kennis van en waardering vir wyn en het verskeie wynkursusse aan die Universiteit van Stellenbosch, die Wine & Spirit Education Trust en die Kaapse Wynakademie voltooi. Haar blik in haar blog oor The Best Value Wineswas ondernemend, goed ingelig en oorredend.
Volgens die paneel van bekende plaaslike wynskrywers – mnre. Dave Hughes, David Biggs, Neil Pendock, Danie Keet en Edo Heyns asook mee. Cathryn Henderson en Samarie Smith – was die standaard in vanjaar se kompetisie baie hoog.
Die Veritas Jong Wynskrywer-kompetisie se doel is om opwindende nuwe individue binne en buite die wynbedryf uit te ken wat die wynboodskap innoverend kan oordra en sodoende meer openbare belangstelling in alle aspekte van verantwoordelike wynwaardering te aanwakker. Die Suid-Afrikaanse Nasionale Wynskouvereniging (SANWV) het dié kompetisie verlede jaar in die lewe geroep.
As wenner van die kompetisie wen Mkhwanazi 'n kontantprys van R15 000 en Knowles R7 500.
