Die onderneming wat hom vir 'n biobrandstof-bedryf in Mosambiek beywer, Mozambique Bio-Fuel Industries (MBFI), sê meer as 150 Suid-Afrikaanse boere, waarvan sowat 50 met die nodige kapitaal, het hul belangstelling laat blyk om by die projek in dié land betrokke te raak.
Mnr. Alti Steenkamp, uitvoerende hoof van die MBFI, sê daar is besluit om die intreebedrag vir beleggers van R750 000 tot R300 000 te verminder sodat hulle diegene kan help "wat nie die volle bedrag het nie". Tien Suid-Afrikaanse boere het reeds deposito's betaal.
Die projek is onlangs in Maputo bekend gestel nadat die Mosambiekse regering 3,5 ha landbougrond beskikbaar gestel het vir die verbouing van jatropha en kassawe waaruit bio-diesel en etanol vervaardig kan word. Volgens Steenkamp sal beleggers 'n onafhanklike plaas van 1 500 ha tot 4 500 ha kry waarop hulle gewasse vir die gemeenskaplike bio-brandstofaanlegte kan aanplant, of gewasse van hul keuse.
"Die intreekapitaal sluit ál die regsprosedures in vir die vestiging van die gemeenskaplike onderneming sowel as die prosedures vir die konsessiereg op die grond. Talle beleggers in Mosambiek volg nie die regte prosedures nie wat vertragings van jare kan veroorsaak en veroorsaak dat hulle hul geld verloor. Met ons ervaring behartig ons die 28 stappe wat nodig is voor 'n belegger die reg het om 'n onderneming te bedryf."
Hy sê afgesien van 'n onafhanklike plaas kry die belegger ook aandele in die gemeenskaplike plase en brandstofaanlegte in 'n provinsie. Die sakeplan maak voorsiening vir 'n etanolaanleg van 60 miljoen liter per jaar per provinsie uit kassawe. Dié gewas is geskik vir Mosambiek en net in die provinsie Nampula word 2,27 miljoen ton verbou - genoeg om 380 miljoen liter etanol mee te maak. "Die kontantvloei uit die etanolaanlegte moet dan voorsiening maak vir bio-dieselvervaardiging uit jatropha. Dit duur 18 maande vir Jatropha curcas om saad vir bio-diesel te produseer en is eers ná vyf jaar in volle groei."
Die eerste projek word vir die provinsie Nampula, sowat 1 200 km noord van Beira, beoog omdat daar infrastruktuur, soos 'n hawe, krag, water, behuising en gevestigde kassawe-produksie, is. Beleggers kan egter ook plase in ander provinsies aanskaf.
26 Mei 2006
