Die stryd tussen die landboumaatskappye BKB en OVK om beheer oor die veselmaatskappy CMW Operations te verkry, het ’n nuwe wending geneem. BKB het bekend gemaak dat hy ’n regsgeding gaan begin.
Dit volg op mnr. Arthur Short, voorsitter van SA Mohair Brokers (SAMB), se reëling op ’n vergadering in Port Elizabeth dat sommige van die prokurasies wat BKB van SAMB se aandeelhouers bekom het, onregmatig was. Die verteenwoordigers van BKB is gevolglik die reg van deelname en stemreg op die vergadering geweier en versoek om die vergadering te verlaat.
Die aandeelhouers op die vergadering het met ’n meerderheid ten gunste van OVK se aanbod gestem. Landbouweekblad het op goeie gesag verneem dat BKB daarin geslaag het om binne drie weke meer as die verlangde 25% prokurasies vir aandele in SAMB te bekom, wat daarop gemik was om OVK se aanbod te stuit.
Mnr. Chris Louw, voorsitter van BKB, het aan Landbouweekblad bevestig dat BKB sy prokureurs opdrag gegee het om ’n regsgeding teen die besluit aanhangig te maak. Louw wou nie uitbrei oor die aard van die stappe wat BKB beoog nie, maar het bevestig dat ’n brief in dié verband aan die direksie van SAMB gerig is.
Lees meer in Landbouweekblad se uitgawe van 18 Desember 2009.
Lees ook:
BKB-gesprek laat veselbedryf gons
15 Desember 2009
