'n Blink toekoms wag op die kleinveebedryf - en wol in besonder. Diegene wat hul bestaan daaruit maak, het min rede om hulle oor die toekoms te kwel, sê prof. Johan Willemse, hoof van die departement landbou- ekonomie aan die Universiteit van die Vrystaat.
Willemse het op die 80ste kongres van die NWKV in Port Elizabeth gesê Australiese skaapvleis het, ondanks die wêreld die grootse resessie die afgelope 50 jaar, die hoogste prys nóg op die uitvoermark behaal. Daar kan derhalwe nóg beter tye verwag word die dag as die ekonomie opswaai.
Dit is veral betekenisvol dat die plaaslike prys van skaapvleis ondanks die afplatting in die ekonomie hoër as R30/kg gebly het. "Die rede is waarskynlik die feit dat skaapvleis nou in 'n nismark verkoop en nie meer net as 'n kommoditeit verhandel nie."
Dieselfde geld wol. Hoewel die prys daarvan die afgelope twee seisoene teruggesak het, dui alles daarop dat die vesel aan die vooraand van 'n groot oplewing staan.
Die afgelope drie weke het pryse reeds skerp gestyg. "Dit sou nie gebeur het as daar nie 'n goeie toekoms vir die vesel was nie. Die feit dat die wêreldproduksie 'n laagtepunt bereik het en die olieprys styg, behoort verder in wol se guns te tel. Daar is 'n sterk verband tussen oliepryse en dié van sintetiese vesel."
Nóg 'n pluspunt is dat diegene wat met wolskape boer, die voordeel het dat hulle nie net aan die plaaslike mark blootgestel is nie maar dat 60 % van die skeersel na China en Indië uitgevoer word. In dié lande is daar steeds ekonomiese groei.
5 Junie 2009
