Riëtte du Plessis van Durbanville in die Kaap het vir ons 'n selfie van haar pampoenkoekies ingestuur. Sy skryf: “Vandat ek kan onthou, maak my ma al vir ons pampoenkoekies en was dit 'n groot deel van ons Sondag-middagetes. Nadat ek dus in Maart getrou het, sit ek maar die tradisie voort en maak vir my man ook pampoenkoekies soos my ma altyd gemaak het. Pampoenkoekies is vir my amper soos nagereg saam met die hoofmaal! ’n Mens kan enige goeie boerekosresep in die Kook & Geniet kry wat ek by my ma gekry het toe ek uit die huis getrek het – dus kom my pampoenkoekieresep ook daaruit. Ek maak al pampoenkoekies sedert my vroeë laerskooljare en kan al die resep uit my kop maak, ’n klein aanpassing tot die resep is egter 'n tikkie kaneel in die beslag. Die finale produk moet natuurlik ook genoeg kaneelsuiker hê."
Elsabé Oosthuizen van ’n plaas by Aliwal-Noord in die Oos-Kaap en ma van twee dogtertjies, is ons ander wenner met ’n selfie van haar soetbrood-bolletjies. Sy skryf: “Ek het soetbrood-bolletjies gemaak - een van ons gunstelinge! ’n Mens maak witbrooddeeg aan en rol dit in bolletjies, gooi een koppie room, een koppie bruinsuiker en bietjie kaneel oor en bak hom dan toe in die oond vir so 40 minute... dit maak 'n heeeerlike karamelsous onderin! Ek en my man, PW, eet so ’n bak alleen op!”
Klik net op die foto's om te vergroot.
Riëtte se pampoenkoekies.
Elsabé se soetbrood-bolletjies.
