Daar word gehoop dat die memorandum van ooreenkoms wat binnekort deur die Departement van Landbou, Bosbou en Visserye en die Departement van Waterwese en Omgewingsake onderteken sal word, die weg sal baan vir die spoediger toekennings van permitte om bosboubedrywighede in die land uit te brei.
Me. Tina Joemat-Pettersson, Minister van Landbou, Bosbou en Visserye, het op ’n bosbou-indaba by die Fish River Sun haar kommer uitgespreek oor die vertragings wat voorkom in die toekenning van permitte om meer bosbougebiede in die land te vestig. Dit is deels toe te skryf aan die feit dat grond wat vir die doel geskik is, ook vir ander landboudoeleindes gebruik kan word en daar ’n siening is dat plantasies afloopwater verminder.
Volgens Joemat-Pettersson beskou die Regering bosbou as een van die hoekstene vir volhoubare landelike ontwikkeling. “Hout speel ’n groot rol in die lewe van talle Suid-Afrikaners en is in die eerste én tweede ekonomie gevestig. Die sektor het sowat 170 000 mense in diens en lewer ’n jaarlikse bydrae van R12 miljard tot die landsekonomie.”
Lees meer in Landbouweekblad se uitgawe van 2 Oktober 2009.
28 September 2009
