Die uitbreking van bek-en-klouseer in Brasilië in 2005 het daartoe gelei dat Suid-Afrika ’n verbod op die invoer van vark- en beesvleis van dié land geplaas het. Die Brasiliaanse regering meen dit is tyd dat dié verbod opgehef word.
“Ons hoop om ten minste die verbod op beesvleis teen die einde van die jaar opgehef te kry,” sê me. Mari Carmen van die Brasiliaanse ambassade in Pretoria luidens ’n berig van Meat and Trade News Daily.
Daar is toenemende druk op Suid-Afrika om dié kwessie aan te pak, maar daar bestaan steeds kommer oor gesondheids- en veiligheidskwessies. Volgens mnr. Tim Davidson van die SA Vleisbedryfsmaatskappy (Samic) moet vleis aan sekere standaarde vir veiligheid en gesondheid voldoen. Die verbod sal eers opgehef word wanneer plaaslike veeartsenykundige dienste meen Brasiliaanse vleis hou geen gevaar vir die Suid-Afrikaanse kudde in nie.
Aangesien Suid-Afrika ’n netto invoerder van vleis is, kan ingevoerde vleis van Brasilië plaaslike beesvleispryse afdwing. Volgens mnr. Simon Streicher van die SA Varkvleisprodusente-vereniging het ingevoerde varkvleis van Brasilië in die verlede varkvleispryse afgedruk, maar hy meen dis geen rede om invoer te verbied nie. “Die belangrike kwessie is om te verseker dat ons gesondheidstandaarde nie in gevaar gestel word nie.”
Bron:
2 November 2009
