Die provinsie se dieregesondheidsforum sê staatsveeartsenydienste het die besmette varke onmiddellik onder kwarantyn geplaas.
Dringende toetsing van varke in gebiede wat aan dié kwarantynsone grens, het bevind dat geen ander varke met hierdie hoogs aansteeklike, dodelike en potensieel ekonomies verwoestende siekte besmet is nie. Afrika-varkpes hou nie ’n gesondheidsbedreiging vir mense in nie.
Die afdeling veeartsenydienste van die nasionale departement van landbou, grondhervorming en landelike ontwikkeling het onderneem om binnekort sy eie verslag oor die uitbreking aan Landbouweekblad te verskaf.
Intussen lui ’n kort verslag wat deur die wêreldorganisasie vir dieregesondheid (WOAH) uitgereik is, dat dié uitbreking buite Suid-Afrika se amptelike beheersones vir dié siekte voorgekom het.
Volgens inligting wat op die departement se webwerf is Afrika-varkpes endemies in dele van Limpopo, Mpumalanga, Noordwes en KwaZulu-Natal. Die afgelope paar jaar is die siekte egter op plekke reg oor Suid-Afrika geïdentifiseer.
Volgens die KwaZulu-Natalse dieregesondheidsforum is die varke wat in die distrik Ixopo besmet is, saam deur sowat vier of vyf kleinskaalse boere besit. ’n Ondersoek na hoe die betrokke varke die siekte opgedoen het, duur voort.
Die WOAH se webwerf sê dat Afrika-varkpes ’n virussiekte is wat maklik kan versprei. Die virus kan op klere, stewels, wiele en ander materiaal oorleef. Dit kan ook in verskeie varkvleisprodukte soos ham, wors of spek oorleef. Daarom kan menslike gedrag ’n belangrike rol speel om hierdie varksiekte oor grense heen te versprei as daar nie voldoende biosekerheidsmaatreëls getref word nie.
Die WOAH se inligting lui dat die betrokke besmetting in die distrik Ixopo op 6 Julie geïdentifiseer is. In die betrokke varkkudde van 87 diere het 16 positief vir Afrika-varkpes getoets. Altesaam 15 van die siek varke het reeds weens die siekte gevrek.
