Foto: Fredalette Uys
Bloednier bly die grootste oorsaak van vrektes weens siekte by skape, en boere moet voortdurend daarteen waak.
Indien hulle nalaat om dit te doen, kan hulle groot verliese ly, sê dr. Faffa Malan, bestuurder van die Herkouerveterinêre Vereniging van Suid-Afrika (Ruvasa), in sy verslag oor siektes wat in Junie aangemeld is.
Bloednier het verskeie oorsake, soos die dermkanaal wat ophou funksioneer (stuwing), skielike verandering van swak veld na welige, groen weiding, vinnige verandering in die dieet, beweiding van voergewasse soos lusern, groen koring en groen hawer, ’n dieet wat baie proteïen bevat, ooreet aan konsentraat of weidings, ontwurming en infeksie met koksidiose.
’n Vinnige verandering in die weer en verlepte weiding kan ook ’n aanleidende oorsaak wees.
Malan sê veeboere moet hul diere ook teen botulisme inent as hulle hoendermis gaan voer.
Voedingstekorte is ook by Ruvasa aangemeld. “Dit is belangrik dat ooie en koeie voldoende aanvullings kry sodat hulle genoeg kolostrum (biesmelk) vir hul lammers en kalwers kan hê wanneer hulle lam of kalf,” gee hy raad.
