Die algemene welsyn van mnr. Gerrit van Zyl se Hanzyl-Bonsmarastoetery het handomkeer verbeter sedert hy laestremming-beeshantering (LSBH) in die distrik Dewetsdorp begin toepas het, al moet hy die goedige spottery van sy familie en vriende verduur dat hy nou kwansuis ’n “koeifluisteraar” geword het.
Die laestremming-hantering van grootvee was een van die hoogtepunte wat Van Zyl bybly ná sy besoek aan die Amerikaanse Beesvleisverbeteringsfederasie se kongres in Houston, Texas, vroeg verlede jaar nadat sy stoetery die tweede keer as Absa en die Landbounavorsingsraad se nasionale Prestasietoetskudde van die Jaar bekroon is.
Op die kongres het Van Zyl ag geslaan op ’n praktiese demonstrasie ten opsigte van LSBH deur prof. Ron Gill van Texas se A+M-universiteit. Gill het onder meer getoon hoe hy sonder ’n bohaai manalleen ’n lewendige Brahman-vers kan uitkeer.
Van Zyl het dit op sy eenvoudige manier, met beperkte kennis, in sy boerdery begin toepas. Tot sy verbasing het die Suid-Afrikaanse Bonsmara dieselfde as die Brahman-beeste in Texas opgetree. “Dit gebeur sonder ’n geskree of die gebruik van kieries of pype. Die grootste verskil is die kopskuif wat gemaak moet word,” sê Van Zyl. Kyk hier na ‘n video waar Van Zyl dié beeshantering toepas.
