As jy al McGregor in die Wes-Kaap besoek het, is die kans goed dat jy ’n draai by Eseltjiesrus gemaak het. Dié veilige hawe vir afgeleefde, verwaarloosde donkies wat 16 jaar gelede op die been gebring is, maak mense ook bewus van hul merkwaardige eienskappe, soos getrouheid en nederigheid.
Die musieklegende David Kramer het in 2008 ingestem om beskermheer van hierdie donkie-oord te wees. Dr. Johan van Zijl, voorsitter van die Eseltjiesrus Raad, sê dit was ’n eer om dié gevierde en gerespekteerde musiek-en-teaterpersoonlikheid te betrek vanaf die ontstaan van Eseltjiesrus.
“Ek het nog altyd ’n sagte plekkie vir donkies gehad,” sê Kramer. “As kind het ek hulle gereeld donkiekarre sien trek, daar is op hulle geskree en hulle is geslaan. Hulle het altyd so moeg en verwaarloos gelyk. Dit was vir my onregverdig dat hulle so mishandel is.”
Kramer het die liedjie “Donkiehemel” geskep en opgeneem om bewustheid te skep van die lot van werkende donkies, wat tot vandag toe nog goedere, boumateriaal, vullis, water en kos vir hul eienaars vervoer, asook die welsynswerk wat by Eseltjiesrus plaasvind.
Daar is tydens ’n onlangse besoek aan Eseltjiesrus voorgestel dat hy ’n liedjie vir hulle skryf. “Aanvanklik kon ek my nie indink wat ek oor donkies sou sing nie, maar die volgende dag het ek die transformasie by die meeste van hierdie diere gesien. Dit het by my opgekom dat Eseltjiesrus vir ’n mishandelde donkie soos die hemel moet lyk. Toe ek eers die idee gehad het, het die liedjie redelik maklik gekom.”
“Donkiehemel” is op Wêreld-donkiedag op 8 Mei bekend gestel en sal volgens me. Annemarie van Zijl, medestigter van Eseltjiesrus, lank benut word om bewustheid te skep van die belang en behoeftes van donkies.
Boekliefhebbers kan uitsien na die Eseltjiesrus-boekefees wat vanjaar van 16 tot 18 Junie by Robertson-Oos se kerksaal aangebied word. Duisende nuwe en tweedehandse boeke sal te koop wees ten bate van die donkies by Eseltjiesrus.
Besoek www.donkeysanctuary.co.za vir nog inligting en luister by www.donkeysanctuary.co.za/donkiehemel.mp3 na “Donkiehemel”.
