Luidens die jongste Cape Wools-verslag het die nie-RWS-aanwyser met 1,1% toegeneem tot R159,48/kg, terwyl die RWS-aanwyser met 1,4% gedaal het tot R164,49/kg op die 12de veiling van die huidige seisoen.
Luidens die verslag het die meerderheid van die aanbod bestaan uit goeie lengte wol, met 44,5% van die Merino-aanbod wat volhoubaar geproduseer is. Die mark het egter steeds goed vertoon, met die rand wat sedert die vorige veiling met 3,1% teenoor die Amerikaanse dollar verstewig het. Die Australiese dollar het self teen die Amerikaanse dollar verstewig, en al het die Australiese mark effens teruggesak met 0,7%, het die mark in Amerikaanse dollarwaarde verbeter.
Volgens mnr. Isak Staats, hoofbestuurder van wol en sybokhaar by BKB, kry die wolbedryf swaar aangesien China nie met sy normale oorgawe koop nie. Die land koop nagenoeg 75% van die wêreld se wol vir verwerking, met nagenoeg 80% van die verwerkte wol wat na eindverbruikers in sy plaaslike mark gaan.
“China se inperkings hou net aan en aan. Die verbruikersmark is dus kwaai onder druk. Die ouens wat normaalweg bereid was om premies te betaal vir duurder klere is net nie daar nie.”
Hy sê daar is steeds ’n premie vir RWS-wol, wat onder omstandighede goed is, en dit beteken daar is steeds lewe.
Ander wolgebruikende lande soos Europa en Amerika gaan gebuk onder skerp hoër inflasiekoerse weens hoë energiekoste en stimuluspakkette ná die covid-19-pandemie.
Rentekoerse in veral Europa is steeds besig om te styg, met gebruikers wat die verhoogde rentekoerse met hul spaargeld finansier.
Bedryf siklies van aard
Staats herinner boere egter daaraan dat die wolbedryf siklies van aard is.
“Buiten al die eenmalige gebeurtenisse wat nou plaasvind, is ons tans aan die onderkant van ’n siklus. Hy sal weer opgaan.”
Die agterstand met die uitvoer van Suid-Afrikaanse wol is uitgewis nadat Suid-Afrika bykans vyf maande lank nie wol na China kon uitvoer nie. China het begin April ’n verbod op die uitvoer van produkte van diere met gesplete hoewe van Suid-Afrika na China ingestel.
“Ons is ongelukkig twee veilings agter. Die veilings sal eers in die nuwe jaar ingehaal word. Waar ons normaalweg ons 16de veiling einde November sou aanbied, sal ons nou net by die 14de veiling uitkom.
“Die logistieke agterstand is uitgewis, nou moet ons net die aanbiedingagterstand uitwis.”
