Luidens die Cape Wools-markverslag vir die 17de veiling het gesertifiseerde wol se prys tot R189,08/kg gestyg, die hoogste prys nóg dié seisoen. Dít was ’n goeie premie teenoor nie-gesertifiseerde wol, wat op R173,81/kg gesluit het. Die Suid-Afrikaanse Merinowolaanbieding bevat ook nou ’n aansienlike volume van 41,5% wat uit gesertifiseerde wol bestaan.
Die herstel in die mark word onder meer toegeskryf aan ’n herlewing in belangstelling vanuit China. ’n Swakker vraag uit China, Suid-Afrika se grootste wolkoper, het aan die einde van 2022 ’n nadelige impak op wolpryse gehad.
Volgens mnr. Deon Saayman, uitvoerende hoof van Cape Wools Suid-Afrika, het die nuwe jaar op ’n optimistiese noot begin ná ’n moeilike jaar van prysdruk en wisselvallige pryse.
