Bokke was nog altyd deel van sy lewe, vertel WA Hugo wat saam met sy vrou, Lillibet, en hul vier kinders, Benjamin, Judah, Joseph en Sion, op hul plaas Bettiesville naby Lambertsbaai woon. WA het gereeld by sy oupa en ouma op Calvinia gekuier, wat altyd ’n klein kudde gehad het.
Bokmelk en bokbotter was deel van die huishouding. Sy ouma het tot in haar 80’s ’n bok gehad wat daagliks vir die huis gemelk is. Toe Lillibet en WA – wie se voorgeslagte in die Brandvlei-distrik geboer het – ontmoet, was daar nie meer familiegrond nie. WA se hart en siel is egter in die landbou.
Hy was ’n plaasbestuurder op verskeie plase in die Wes- en Suid-Kaap. In sy vrye tyd het hy begin om skaaphonde af te rig. Sy skaaphond-onderneming het goed uitgebrei en die paartjie het grond by Heidelberg gehuur waar hy 20 skaaphonde, 300 SA Vleismerino’s en ’n paar bokke kon aanhou.
