Lede van die Hoogland-studiegroep hou al die afgelope vier jaar elke jaar ’n eendaagse jongbulskou met spogdiere uit hul Simbra- en Simmentaler-stoeterye. Dit word gehou op die plaas Ashtonvale van mnre. Abraham en Niel van Heerden van Bethlehem.
Mnr. Willem Botha, voorsitter van die studiegroep, sê lede bespaar baie met sulke kort skoue, maar boet nie die bemarkingswaarde van ’n tradisionele skou in nie.
“As jy ’n gewone skou bywoon, laat jy gewoonlik jou geliefdes ’n week lank tuis. Nou bring jy jou bul na die dagskou, hy word beoordeel en later die dag keer jy terug. Ons mikpunt is om ’n vinnige skou aan te bied wat maklik én goedkoper verloop.”
