Dit is ’n Australiese rekordprys vir ’n werkende hond, berig abc.net.au (https://ab.co/3yYqj0Y). Die 20 maande oue Kelpie is op die Capree-stoetery naby Bathurst in Nieu-Suid-Wallis se jaarlikse veiling verkoop.
Die koper is mnr. Ross Gillmore van die Tattykeel Australian White-stoetery in Nieu-Suid-Wallis, wat in September self ’n rekordprys van Aus$240 000 of R2,76 miljoen vir ’n vleisskaapras behaal het vir een van sy Australian White-ramme (https://ab.co/3CP1iWZ).
Hoewel daar al elders ter wêreld meer betaal is vir ander werkende honderasse, glo die Australiese Skaaphondwerkersvereniging dat dit ’n nuwe wêreldrekordprys vir ’n Kelpie is.
Die vorige rekordprys van Aus$35 000 vir ’n Kelpie is in 2021 betaal vir die reun Hoover in die staat Victoria.
Volgens die eienaar van die Capree-stoetery, mnr. Chris Stapleton, is die teef, Capree Eve, die resultaat van 50 jaar se teling.
“Die teef wat ek vandag hier verkoop het, kan teruggespeur word na sommige honde waarmee ek begin het. Sy is pragtig geteel. Ek het haar eerste skaap vir haar gewys toe sy agt weke oud was en sy het dadelik begin werk.”
Hy sê hoewel dit baie geld is, glo hy dat ’n waardering vir haar goeie teling, die rede is vir die goeie prys wat sy behaal het.
Volgens Stapleton is daar tans ’n goeie vraag na werkende honde. ’n Gemiddelde prys van Aus$12 525 (R144 000) is betaal vir die tien honde wat op sy veiling aangebied is.
Mnr. Michael Grant, voorsitter van die Australiese Skaaphondwerkersvereniging, sê dit is ’n ongelooflike prys en ’n wonderlike uitslag vir die bedryf.
Hy sê oor die jare was daar ’n geleidelike afname in die aantal plaaswerkers, tesame met ’n toename in vee in Australië. Dit lei tot ’n bestendige toename in die vraag na werkende honde.
“Die aantal vee waarmee per man of vrou gewerk word, het moontlik verdubbel. Die behoefte aan ’n goeie hond was nog nooit so sterk nie.”
* 'n Video van die veiling is hier beskikbaar.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
