Ek het die akkuraatheid en gebruik van BLUP in diereseleksie (in die praktyk en in teorie) bevraagteken, met spesiale verwysing na die bees- en skaapstoetbedryf. Ek het ook geput uit my eie ervaring in die veld, asook dié van baie telers reg oor die wêreld.
Afgesien van die wetenskaplike vrae oor BLUP se twyfelagtige waarde en gebrek aan akkuraatheid, is daar nog probleme. Meestal word slegs ’n paar faktore se BLUP-syfers gemeet, wat dan vir baie telers dié faktore verhef tot ’n voorrangposisie in hul seleksiekeuses. Dit lei dikwels tot die verwaarlosing van sommige van die ander belangrikste elemente van “die geheel”. Ons laat dit egter vir die oomblik daar en konsentreer op genetiese oorerwing en omgewingsuitwerkings.
In my vorige skrywe (“Uitlatings nie uit lug gegryp”, LBW, 15 Februarie 2019) het ek aangehaal uit ’n wetenskaplike artikel getiteld “The misuse of BLUP in Ecology and Evolution”, waar wetenskapdepartemente van drie vooraanstaande universiteite uit 50 gepubliseerde navorsingsdokumente aangehaal het. ’n Mens kan nie dié feite weerlê nie.
