Brolloks, Bittergal en Brakanjan is waarskynlik die mees berese skape in Suid-Afrika. Saam het die drie Merino-musketiers die afgelope maand meer as 9 000 km afgelê toe hulle 40 dorpe besoek het as deel van ’n bemarkingstoer saam met mnr. Gawie van Heerden, uitvoerende direkteur van Konsortium-Merino. Die drie stoetramme het boere se harte gesteel sover as wat hulle gegaan het en op Facebook het verskeie mense die toer se vordering daagliks dopgehou en dit baie geniet om die drie musketiers se interaksie met boere te volg.
“My ma sê vanoggend dis net ek wat soveel moeite sal doen vir ’n skaap, want sy glo niemand het daardie passie soos ek nie,” vertel Van Heerden in Bloemfontein, waar die toer die naweek ten einde loop. Hy vertel die reis deur Suid-Afrika se skaapwêreld het “dubbel beter” verloop as wat hy verwag het. Op dié wyse kon hy by boere uitkom wat nog nie voorheen Konsortium-Merino se geharde, veldaangepaste skape van naderby kon leer ken nie.
Die diere word geteel met die
doelwit om vir die kuddeboer geld te maak en Van Heerden glo daar is nie ’n
beter ras as ’n Merino om dít reg te kry nie. “Ons wou wys dis nie ’n
beteuterde skaap wat net kan wol dra en nie droogtes kan deurstaan nie. Ons het
oor die jare bewys die Merino is by uitstek die ras wat konsekwent is in alle
omstandighede om goeie vleis én goeie wol te kan lewer.”
As Karooboer ken Van Heerden droogtes. “Ons het nou al sewe jaar droogte gehad, en dit maak jou nederig. Die grootste les is dat jy ’n droogte nie sal oorleef sonder ’n veldaangepaste dier nie. Ons moet dat Moeder Natuur vir ons die diere klas, nie ’n mens se oog nie.”
Konsortium-Merino’s verkoop deesdae 30% van die Merino-ramme in Suid-Afrika, dis meer as duisend ramme per jaar. Die ramme ondergaan ’n streng seleksieproses voor veilings en word slegs die laaste vier weke voor ’n veiling met voer afgerond, sodat kopers nie sukkel om hulle dadelik in die veld te stoot nie.
Brolloks, Bittergal en Brakanjan sal van volgende maand af ook weer ’n slag in die veld kan gaan uitspan ná hul avonture op die lang pad. Hulle word Saterdagoggend op ’n aanlyn veiling van SwiftVee verkoop. Of Van Heerden ook gaan rus na dié maratontoer, is egter te betwyfel. “Ander ouens vang vis, speel gholf of kyk rugby, maar ek lééf skape.”
