Luvuyo Mabombo, waarnemende hoofbestuurder van OBP, het op ’n mediageleentheid by die maatskappy se hoofkantoor gesê kenners vanuit Duitsland sal die aanleg besoek en die masjien herstel.
“Die raad het besluit dat OBP nie meer kan aansukkel met die bestaande kleiner masjien nie. Dus is die oorspronklike vervaardiger genader om die masjien te herstel. Daar is ook nog ’n masjien gekoop wat teen volgende jaar geïnstalleer sal word en OBP se vermoë meer as verdubbel.”
Malombo het gesê OBP se huidige vermoë is rondom 65 000 flessies per produksie (batch), maar dat die nuwe masjien die vermoë tot 120 000 sal verhoog.
Dr. Jacob Modumo, hoof van verkope, sake-ontwikkeling en bemarking, het erken dat OBP in die verlede benadeel is deur toerusting wat gebreek het, asook deur voorsieningsprobleme, maar meen dat dit iets van die verlede is.
“OBP het intussen hard daaraan gewerk om die situasie te verbeter. Die lang produksietyd van entstowwe, wat soms drie tot vier maande kan duur vanweë die verskillende produksieprosesse wat gevolg moet word, speel ook ’n rol. Daar is ook ’n probleem tussen die produksie van entstowwe en die afsetpunte, wat nou aandag kry.”
Malombo het gesê OBP ontwikkel ’n stelsel waarvolgens kliënte ’n toepassing kan aflaai om produkbeskikbaarheid te sien en om produkte te bestel. “Ons sien veral ’n gaping in die landelike gebiede – juis waar die nood die hoogste is. Hopelik sal die nuwe stelsel hierdie gaping kan vul.”
Modumo het gesê OBP is nou weer voluit besig om entstowwe te produseer. “Ons sal na verwagting van nou af elke week entstof vir Afrika-perdesiekte versprei. Die entstof sal van Junie ononderbroke beskikbaar wees.”
Modumo het gesê die entstowwe wat tans vervaardig word, onderskeidelik vir drie-dae-stywesiekte (B-Phemeral), brucellose (Brucella S19 en Brucella Rev.1), ensoötiese aborsie (Chlamysure), bloutong, slenkdalkoors (lewend én geïnaktiveerd) en vir knopvelsiekte, sal vanaf Junie beskikbaar gestel word.
“Die res van ons produkte is reeds beskikbaar en daar sal dus betyds genoeg entstof wees vir die komende somerreënseisoen,” het hy gesê.
Modumo het dit benadruk dat OBP nog nooit ’n tekort aan slenkdalkoors-entstof gehad het nie, vanweë die ernstige aard van die siekte.
Hy het gesê die maatskappy het ook heelwat nuwe produkte wat deur die registrasieproses moet gaan, maar wat in die volgende twee tot drie jaar beskikbaar gestel gaan word. “OBP se belangrikste klem is die gesondheid van die nasionale kudde. Ons het van die uitvoer van sommige van ons entstowwe beëindig om te verseker dat die nasionale veekudde beskerm word.” Hy het gesê OBP voer sowat 12 van sy portefeulje van 49 produkte uit. “Uitvoer bedra dus 25% van ons verkope. Ons voorrangsaak bly die plaaslike mark,” het hy gesê.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
