My Rottweiler van vier maande is dood aan katgriep. As ek nou weer ’n kleintjie aanskaf, wat is die moontlikheid dat hy dit ook kan kry? Moet die erf ontsmet word of moet ek wag dat die virus verdwyn?
Parvovirus is ongelooflik stabiel en weerstandbiedend. Die virus kan vir langer as vyf maande op voorwerpe, soos klere of vloere van hokke, oorleef. Die meeste ontsmettingsmiddels is nie doeltreffend teen die katgriepvirus nie. Lesers kan F10 SC (reg.nr. G3070, Wet 36 van 1947, Health and Hygiene [Edms.] Bpk.) aanskaf om die omgewing te ontsmet. Volg die verdunningsaanwysings en kontaktyd vir parvovirus.
Die belangrikste is dat lesers nie ’n nuwe hondjie moet kry voor die hondjie ingeënt is teen katgriep nie. Rottweilers is vatbaarder vir die katgriepvirus as ander honderasse. Ek stel dus voor dat indien die leser weer ’n Rottweiler wil aanskaf, hy/sy verseker dat die hondjie eers twee weke nadat dit op vier, ses en nege weke ingeënt is, tuis gebring word (dus op 11 weke).
