Die land het sedert die begin van die jaar 203 renosters aan die hande van stropers verloor. Sou dié slagting voortgaan soos wat tans die geval is, verwag die Private Rhino Owners Associaton (PROA) dat die dodetal vir die jaar meer as 800 sal wees.
Die 16de kongres van die konvensie vir die handel in bedreigde spesies (CITES) het onlangs plaasgevind, en mnr. Pelham Jones, voorsitter van die PROA, sê skokkende statistiek het daar bekend geword. Onder meer is gesê dat renosters in wildreservate teen 2026 kan uitsterf, mits die situasie voortgaan.
Sanksies teen lande wat nie optree
Jones sê tydens die kongres is die gebrekkige optrede van lande, soos Mosambiek en Viëtnam, wat by die misdaad betrokke is, gekritiseer. Afgevaardigdes was baie bekommerd dat dié lande nie genoeg doen om stropers en sindikate wat in die lande aktief is, te vervolg nie.
Die meeste stropers wat in Suid-Afrika aangekeer word, is volgens Jones van Mosambiek afkomstig. “Ons behoort te kyk na sanksies teen lande wat hulle plig versuim. Die optrede deur die staat sou soveel meer fel gewees het as enige ander nasionale skat gesteel sou word soos wat renosters se horings gesteel en die diere afgemaai word.”
Volgens Jones het die afgevaardigdes baie positief reageer op die voorstel dat handel in renosterhoring gewettig moet word. Hy sê deeglike bewusmaking en beplanning sal moet geskied om die voorstel goedgekeur te kry by die 17de CITES kongres wat in 2016 in Kaapstad sal plaasvind.
Renoster uitgesit
Intussen sê die Departement van Omgewingsake ’n renosterkoei moes die naweek in die Kruger Nasionale Park (KNP) van kant gemaak word ná sy deur twee stropers aangeval is.
Twee skote is gehoor, en die renoster en ’n verdagte is gevind. Die renoster het erg gebloei waar haar horings afgekap is, asook uit haar mond met haar tong, neus en oë wat verwyder is. Sy is op die toneel uitgesit. ’n Tweede verdagte word in verband met die voorval gesoek.
Die KNP het sedert die begin van die jaar 146 renosters verloor. ’n Totaal van 18, 17, 13 en 10 renosters is in onderskeidelik Noordwes, KwaZulu-Natal, Limpopo en Mpumalanga doodgemaak. Altesaam 60 vermeende stropers is in dieselfde tyd in hegtenis geneem.
