Drie bedryfskenners deurtrap kwessies soos veesiektes, ’n tekort aan noodsaaklike entstowwe, ’n naspeurbaarheidstelsel en die ontwikkeling van ’n vleisgraderingstelsel, terwyl biosekerheid opgeknap moet word.
Die rooivleisbedryf gaan ’n groeifase binne wat die ontwikkeling van nuwe protokolle en stelsels tot voordeel van die bedryf sal beteken. Die bedryf is reg vir herlewing en vernuwing, en daar is geen beter tyd as nou nie, sê mnr. Dewald Olivier, uitvoerende hoof van die rooivleisbedryfsdienste (RMIS), wat in Augustus verlede jaar gestig is.
Baie werk is reeds gedoen om vergelykende stelsels te ondersoek wat Suid-Afrika kan help om ’n vleisgraderingstelsel in werking te stel. “Die waarde wat ’n graderingstelsel tot die rooivleisbedryf voeg, kan fenomenaal wees, of maar net effens. Die waarheid is ons weet nog nie. Hoewel ons kan bespiegel, sal dit belangrik wees om êrens te begin.”
