Mnre. Willie Clack, nasionale ondervoorsitter van die RPO, en Francois du Toit, voorsitter van die RPO in die Oos-Kaap, het op die RPO en die Nasionale Wolkwekersvereniging (NWKV) se Oos-Kaapse streeksvergadering benadruk dat die vraag na rooivleis ’n geleentheid vir boere skep om hul kuddes te verbeter.
Volgens Clack sal reproduksiedoeltreffendheid verbeter moet word. Hy sê die speenpersentasie van kalwers in die stoetbedryf staan tans op 92% tot 95%, met die kommersiële gemiddelde oor Suid-Afrika heen wat tans op 65% staan, terwyl dié van kommunale boere op ongeveer 32% staan. “Die behoefte aan proteïene gaan bly bestaan en ons moet daarin voorsien.”
Du Toit sê wat sekere aspekte betref, is stoetboere reeds jare voor die kommersiële en kommunale boere met die toepassing van presisieboerdery.
“Stel ondersoek in na (jou diere se) genetiese potensiaal om beter opbrengste te lewer, verbeter teling en seleksie, bestuur weiding, asook die identifikasie van diere beter, ondersoek jou biosekerheidsprogram, ensovoorts,” sê Du Toit.
“Daar moet gereeld en aanhoudend ’n soeke na optimale produksie teen die laagste moontlike insetkoste wees.”
Meer beeste in Limpopo
Clack sê dit is ook nodig om die aantal vroulike beeste na te vors wat in die noordelike dele van Suid-Afrika inbeweeg. Dit is aangesien hy glo dat boere in Suid-Afrika nou weer beeste aankoop omdat talle boere in dié deel van die land weer terugkeer na die beesbedryf.
Wat dieregesondheid betref, sê Clack, is brucellose weer besig om kop uit te steek nadat dié siekte voorheen amper uitgeroei is. Hy sê die Wet op Dieresiektes (Wet 35 van 1984) dwing boere om hul diere daarteen in te ent. Tog dui die huidige syfers oor die aantal verse wat gebore word, asook die hoeveelheid entstof wat aangekoop word, dat slegs 13% van Suid-Afrika se verse daarteen ingeënt is.
“Dit is jóú verantwoordelikheid om jou diere in te ent, te toets en te beheer,” sê Du Toit. “As jy nie die brucellose op jou plaas kan bekamp nie, gaan dit jou afgooi. Ons moet na ons diere begin kyk.”
Volgens Clack is runderpes by kleinvee (peste des petits ruminants, oftewel PPR) ook rede tot kommer, aangesien dié siekte volgens die internasionale organisasie vir dieregesondheid (OIE) reeds in Angola teenwoordig is.
“Ons moet met Namibië saamwerk om te verhoed dat dit by Namibië inkom, want as dit eers in Namibië is, is dit maklik vir die siekte om na Suid-Afrika te beweeg. Ons gaan alles moontlik doen om die siekte te beveg.”
In sy toespraak het Du Toit ook gesê boere sal moet begin lewer wat die verbruiker wil hê, veral ten opsigte van wat diere vreet en hoe hulle gedoseer word. “Ons het tans die verbruiker se simpatieke oor te midde van die droogte; kom ons behou dit.”
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
