Sowat 100 varkies is gedurende die studie, wat deur die Wageningen-universiteit in Nederland onderneem is, grootgemaak volgens tradisionele kommersiële varkboerderybeginsels of volgens alternatiewe metodes.
Die diere in die alternatiewe groep is eers ná nege weke pleks van die tipiese vier weke gespeen. Terwyl hulle gesoog is, het hulle interaksie met ander werpsels gehad, en speelgoed is in hul hokke uitgesit waarmee hulle kon speel. Materiaal is verskaf waarin hulle hulself gemaklik kon inwoel om te slaap.
In die algemeen is hulle in ’n groter spasie aangehou as wat tipies van ’n konvensionele varkboerdery is. Om te kyk hoe die diere binne die opset van ’n varkboerdery vaar, is die vlak van die streshormoon kortisol in hul hare gebruik as aanduiding van hul stresvlakke.
