Suid-Afrika loop ’n énorme risiko om afhanklik te wees van slegs ’n enkele fakulteit om veeartse op te lei . . .
Só sê dr. Ivan Meyer, Wes-Kaapse minister van landbou, wat ’n dringende beroep vir ingryping gerig het aan me. Thoko Didiza, minister van landbou, grondhervorming en landelike ontwikkeling.
Meyer sê hy is bekommerd dat te min veeartse in Suid-Afrika gradueer om in die land se behoeftes te voorsien nie.“
’n Tweede veeartsenykundige fakulteit moet opgerig word om meer veeartse op te lei.
Die kusprovinsies, die Wes- en Oos-Kaap, asook KwaZulu-Natal, is ideale terreine om ’n tweede veeartsenykundige fakulteit te huisves.
“Hierdie provinsies dra meer as die helfte van Suid-Afrika se dierebevolking en kan voordeel trek uit ’n navorsingsplatform wat deur ’n nuwe fakulteit geskep is. Met so ’n inisiatief werk veeartse aan akwakultuur en mariene kultuur sal ook ’n massiewe hupstoot kry."
Hy sê ’n volledig bemande veeartsenydiens is ’n kritieke bemiddelaar vir ’n florerende landbousektor.
“Die tekort aan veeartse plaas Suid-Afrika se ekonomiese vooruitsigte en diere- en mensgesondheid in gevaar.”
Emigreer
Meyer sê die departement moet ook alles in die stryd werp om die neiging van jong veeartse wat emigreer, te keer.
Luidens ’n onlangse verslag van die Suid-Afrikaanse Veeartsenykundige Vereniging wil meer as 50% van Suid-Afrika se jong veeartse emigreer. Van die redes wat aangevoer is, is die plaaslike ekonomie en veiligheid.
“Die internasionale norm is tussen 200 en 400 veeartse per miljoen van die bevolking, maar tans is daar ongeveer 60 tot 70 veeartse per miljoen in Suid-Afrika. Dit verteenwoordig ongeveer 25% van ons land se behoeftes.
“Dit is ’n krisis . . .”
Die tekort word verder vererger deurdat Suid-Afrika veeartse van die kritieke vaardigheidslys verwyder. Dit bemoeilik die proses vir internasionale veeartse om ’n werkvisum te bekom.
“Ons benodig indiensnemings- en vergoedingsvoorwaardes wat ’n bemagtigende omgewing skep. Beroepspesifieke bedeling is een manier wat ondersoek moet word om dit te bereik.
Boonop sal die verbetering van jong veeartse se werksomgewing en loopbaanvooruitsigte die behoud van ’n kritieke vaardigheid in die landbou-ekonomie verseker.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
