Dit is die resultaat van onder meer doelgerigte teling en ’n algemene tekort aan SA Vleismerinoramme wat tot dié prestasie bygedra het.
Resultate soos rekordpryse op veilings word nie oornag bereik nie. Dit is die beloning vir harde werk oor ’n lang tyd, ’n taak wat toewyding en deursettingsvermoë met die benutting van die beste genetiese materiaal verg, en die bereidwilligheid om by medeboere raad te vra.
Mnr. Willie Geldenhuys en sy vrou, Nadia, bedryf saam met sy pa, Petrie, ’n gemengde boerdery by Ventersdorp. Willie en sy gesin woon op Kaalfontein en hy is in beheer van die SA Vleismerino’s, terwyl Petrie en sy vrou, Retha, op ’n aanliggende plaas, Roodekop, woon en die leisels by die kommersiële vleisbeeskudde hou.
