Suid-Afrika se beste vleisbeeskuddes is deur SA Stamboek op ’n virtuele uitsending bekend gemaak. Altesaam nege Bonsmara-, een Beefmaster-, een Angus- en ’n Senepol-stoetery is as streekwenners aangewys.
Die streekwenners wat platinum-toekennings ontvang het, is dr. Hendrik Meyer (Beefmaster, Naboomspruit, Limpopo, ’n voormalige nasionale wenner), mnr. Fourie Scheepers (Zinabos-Bonsmara, Fouriesburg, Oos-Vrystaat), mnre. WH en Thabo van Zyl van Thuso-graan (Bonsmara, Wesselsbron, Wes-Vrystaat), en mnre. Robert Hobson en Stefan Terblanché (Angus, Fredericksburg-landgoed, Wes-Kaap).
Dubbelgoud
Streekwenners met dubbelgoue toekennings is mnre. Hannes van den Berg (Kalkveld-Bonsmara, Reivilo, Noordwes), Derek Ralfe en sy vrou, Tutu, (Up George-Bonsmara, Wasbank, Kwazulu-Natal), Boeram Venter (Disco-Bonsmara, Addo, Oos-Kaap) en Charl Uys (Marochel-Bonsmara, Jan Kempdorp, Noord-Kaap).
Streekwenners met goue Elite-status is mnre. Nico Pieterse (Syferfontein-Bonsmara, Standerton, Mpumalanga), Frik Venter (Le Fre-Bonsmara, Bronkhorstspruit, Gauteng) en dr. Joggie Briedenhann (Bonsmara, Tristone-trust, Namibië). Die Suid-Kaapse streekwenner is mnr. Pieter van Wyk van die Vet-Kragga-boerdery (Senepol, Riversdal) met silwer status.
Platinumstatus
Ander telers wat ook Elite-platinumstatus verwerf het, is mnre. André Breytenbach (Maluti-Angus, Bethlehem), Wilhelmus van der Schyff (Schyff-Beefmaster, Soutpan), Gawie en Frik Roux (Rouvus-Drakensberger, Ventersburg) en die Bonsmaratelers Thinus Maritz (Vaalwater, Limpopo), Daan Viljoen en sy broer Dirk (Clarens) en Frikkie Kruger (Boshof).
Altesaam 119 brons, 109 silwer en 92 goue en 16 dubbelgoue eerbewyse is op die geleentheid aan telers toegeken.
