"Dit is slegs die sewende vleisbeesras op die Afrika-vasteland wat die voordeel het om hierdie tegnologie deel te kan maak van meer ingeligte telingsbesluite,” sê SA Stamboek en die Santa Gertrudis-beestelersgenootskap van Suid-Afrika in ’n gesamentlike verklaring.
Dié stap volg nadat die telersgenootskap aan die einde van 2022 besluit het om weer lid te word van SA Stamboek en die dienste te benut wat deur Logix, Stamboek se diere-aantekeningstelsel, gebied word. “Dit beteken ’n Santa Gertrudis-teler kry nou voortaan, met elke maandelikse genetiese evaluasie, wat genomiese inligting insluit, ’n volledige elektroniese verslag wat die volledige status van sy kudde aandui en waar hy hom kan meet aan die res van die ras,” sê dr. Japie van der Westhuizen, hoofbestuurder van SA Stamboek.
Stamboek se veekundige genetici het ook eiesoortige en pasgemaakte seleksiewaardes ontwikkel wat dit makliker maak vir telers om meer geskikte vervangingsdiere te kan selekteer en aan te bied vir kommersiële bulkopers. Telers kan ook self foto’s van hul diere direk op Stamboek se Logix-databasis laai. Hierdie foto’s verskyn nie net op die dierinligting-verslae nie, maar ook outomaties op www.SABeefBulls.com, die omvattende genetiese inligtingstelsel, en op die veilingskatalogus.
“Vir die eerste keer in die bestaan van www.SABeefBulls.com is die Santa Gertrudis-data dus ook nou beskikbaar op die gewilde webblad,” sê Van der Westhuizen.
Voorloper vergemaklik ander se taak
Die Santa Gertrudis-ras is eintlik die voorloper om die pad vir ander rasse makliker te maak om in te skakel by Stamboek se stelsel. Dit is omdat daar baanbrekerswerk gedoen is om die die dataformate om te skakel sodat dit versoenbaar is met Stamboek se stelsel en die datagehaltebeheer aan te pas by die vangnette van Stamboek se stelsel. “Hierdie belangrike mylpaal is bereik deur die harde werk en noue samewerking tussen die kantoorpersoneel en raadslede van die Santa Gertrudis-beestelersgenootskap van Suid-Afrika, en die personeel van SA Stamboek se rekenaar-, wetenskaplike en data-afdelings,” sê Van der Westhuizen.
Santa Gertrudis-telers neem die behoorlike evaluasie en aantekening van hul beeste ernstig op, luidens die verklaring. “Deelname aan groeitoetse en veral toetse waar die inname van individuele diere gemeet word, asook die meting van karkaskenmerke deur ultrasoniese metings, vorm deel van die strategie.”
Hierdie inligting word gebruik om die seleksiewaardes, met die samewerking van Stamboek, verder uit te brei om die genetiese meriete van teeldiere vir groeidoeltreffendheid en karkaswaarde akkurater te bepaal.
Stamboek verteenwoordig 65 melk- en vleisbeesrasse, kleinveerasse, varke, perde en honde.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
