Die drastiese toename in gevalle van Afrika-perdesiekte die afgelope paar maande in die endemiese sone van Suid-Afrika noodsaak die opskorting van die verskuiwing van perde, donkies, muile en sebras na die beheerde gebied van die Wes-Kaap.
Die Wes-Kaapse departement van landbou sê in ’n verklaring dat algehele of gedeeltelike beheer in alle ander provinsies en Beaufort-Wes in die Wes-Kaap toegepas word. “Die situasie word dopgehou om regstreekse beperkings na die beheerde gebied te versterk of te verslap.”
Perde-eienaars moet bewus wees dat enige verskuiwing van perde, donkies, muile en sebras na die Afrika-perdesiekte beheerde gebied hulle kan verplig om via ’n geregistreerde oorstaankwarantyngerief te beweeg.
Permitte en inenting
Permitte om perde, donkies, muile en sebras na die beheerde gebied te verskuif, kan by move@myhorse.org.za aangevra word.
Die lys van geregistreerde oorstaankwarantyngeriewe kan ook by dié e-posadres aangevra word.
Permitte moet aangevra word om enige perde, donkies, muile en sebras na die beheerde gebied te verskuif, selfs as hulle via ’n oorstaankwarantyngerief verskuif word.
Die tydperk waarin inenting teen Afrika-perdesiekte in die beheerde gebied toegelaat word, is 1 Junie tot 31 Oktober, elke jaar.
Die Wes-Kaapse departement van landbou waarsku dat inenting in die beheerde sone net met toestemming van die staatsveeartsenydiens mag geskied.
Daardie toestemming kan van vaccinate@myhorse.org.za verkry word. ’n Geregistreerde veearts moet die aansoek om toestemming doen.
