Die Dieregesondheidsforum gaan versoek word om druk op die staat te plaas oor talle kwessies wat die land raak en die veebedryf kan benadeel. Een kwessie wat volgens die Federasie van Rooivleisprodusente van Suid-Afrika dringend aandag kort, is invoere van Namibië.
Luidens ’n verklaring wil die federasie hê dat die forum druk moet plaas op die Departement van Landbou, Bosbou en Visserye “om spoedig duidelikheid te gee oor hoe die Namibiese invoere hanteer gaan word om die plaaslike rooivleisprodusent te beskerm.”
’n Afvaardiging van die federasie wil ook ’n vergadering reël om die invoer van beeste van Botswana te bespreek.
Zambië en veediefstal
Die federasie sê wat dieregesondheid betref, is tuberkulose tans ’n groot bekommernis omdat die staat nie so ver kom om dit verpligtend te maak om vir die siekte te toets nie.
“Die federasie is (ook) bekommerd dat die invoer van swartwitpense van Zambië na Suid-Afrika die land se bek-en-klouseer-status by die internasionale organisasasie vir dieregesondheid (OIE) in gedrang sal bring,” aldus die verklaring.
Ten slotte het die vergadering bevestig dat een van die groot uitdagings rondom veediefstal en die bekamping daarvan is dat boere nie hul vee merk nie. “Sodoende kan eienaarskap van diere nie bewys word nie, wat beteken dat veediewe skotvry wegstap.”
