Hartstog en toewyding vir die suiwelbedryf is die sleutelfaktore wat waarskynlik vanjaar se Vrystaatse meestersuiwelboer van 2013 laat wen het.
Die MD Foundation onder aanvoering van mnre. Jacques Möll van Ficksburg en sy vennoot, mnr. Hannes Pretorius, is op die jaarvergadering van die Vrystaatse tak van die Meestersuiwelboer-vereniging as die wenner aangewys.
Vanjaar het hulle ook met die kudde met die hoogste punt vir visuele beoordeling in die kompetisie gespog.
Verlede jaar se provinsiale en ook nasionale wenner van die meestersuiwelkompetisie, Inovula van dr. Kobus Hendriks van Heilbron, was tweede en in die derde plek was die Omikron-boerdery van mnr. Poena van Niekerk van Brandfort.
Möll sê die geheim van hulle sukses is “die goeie verhouding wat ons met ons mense en die deelnemers in ons bedryf het.” Hy was reeds vier keer die provinsiale en een keer die nasionale wenner van die kompetisie.
Hy en Pretorius behartig die suiwel-afdeling van hulle gesamentlike boerdery, terwyl die groep ook oor ’n vleisbees-, skaap- en graanverbouingvertakking het. MD Foundation is ook betrokke in sandsteenverwerking en geestelike uitreiking.
Foto-byskrif:
Die Vrystaat se meestersuiwelboere vir 2013 is mnre. Hannes Pretorius (tweede van links) en Jacques Möll (tweede van regs). Links is mnr. Poena van Niekerk van Brandfort in die derde plek en regs dr. Kobus Hendriks van Heilbron (tweede plek). Mnr. Rampie de Wet (middel) van SA Stamboek is die organiseerder. Foto: Johan Norval
