Luidens die Cape Wools-wolverslag het die prys van gesertifiseerde wol met 3,2% toegeneem tot R183,62/kg, terwyl die prys van nie-gesertifiseerde wol met 2,5% toegeneem het tot R170,63/kg. Nagenoeg 70% van die aanbod het 20 mikron of fyner getoets, met 51,6% van die Merinowol wat aangebied is, wat volhoubaar gesertifiseer was.
“Die mark het weer teruggebons en goeie resultate is oor alle mikronkategorieë behaal, met goeie mededinging van kopers en verkope van 94,7% van die aanbieding.”
Daar was weer ’n goeie vraag na gesertifiseerde wol op die veiling, met goeie premies wat vir fyner wol betaal is. Die prysstygings is ondanks ’n versterking in die rand teenoor die Amerikaanse dollar.
Die grootste verskil tussen gesertifiseerde en nie-gesertifiseerde wol was 15,65% in die 18 mikron-kategorie en 10,69% in die 17,5 mikron-kategorie.
Australiese markte het op die ooreenstemmende veiling verlede week gesukkel, met pryse wat gedaal het. Volgens die AWI is die grootste rede vir prysdalings logistieke probleme in die Melbourne-hawe, wat uitvoer beperk en ’n nadelige uitwerking op wolpryse het. Daarby het die onsekerheid en verliese die afgelope paar weke binne die banksektor ook ’n ongunstige uitwerking op die vraag na wol gehad.
Volgens Cape Wools lyk dit asof daar meer stabiliteit in die Australiese mark te sien was die week.
Die volgende wolveilings sal op 29 Maart aangebied word.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
