Dieresiektes wat deur insekte oorgedra word, soos driedagstywesiekte, knopvelsiekte, bloutong en perdesiekte, vier hoogty oor 'n wye gebied ná die baie reën van die afgelope twee maande.
Knopvelsiekte het veral in Limpopo, Noordwes en Botswana uitgebreek, terwyl feitlik alle beeskuddes in Mpumalanga onder driedagstywesiekte deurloop. Bloutong maai in dié provinsie onder verlede jaar se skaaplammers.
Volgens dr. Pieter Schoeman, 'n veearts van Hendrina, is honderde skape betrokke.
Mnr. Willie Botha, nasionale verkoopsbestuurder van Onderstepoort Biologiese Produkte (OBP), sê ongelukkig het baie boere kanse gevat en nie voorkomend in die lente vir dié siektes ingeënt nie.
Hoewel steeds gespuit kan word met die oog op die res van die seisoen, moet boere in gedagte hou dat dit tot drie weke kan duur voor genoeg weerstand opgebou is om beskerming te bied.
Hy sê gerugte dat daar 'n tekort aan entstowwe is, is onwaar. "Die OBP het genoeg voorraad van dié entstowwe beskikbaar".
Mnr. André Botha, bestuurder van die roofvoëlwerkgroep van die Trust vir Bedreigde Natuurlewe, sê enkele gevalle het onder sy aandag gekom van boere wat Voltaren gebruik om beeste met driedagstywesiekte te behandel.
Hy waarsku dié middel is slegs vir menslike gebruik geregistreer. Dit bevat diklofenak wat dodelik is vir aasvoëls.
Hy vra dat boere hul veeartse raadpleeg vir alternatiewe middels om simptome van die siekte mee te behandel.
17 Maart 2006
