Veranderinge aan die Europese Unie (EU) se landboubeleid kan ’n geleentheid vir plaaslike suikerrietboere inhou, sê die Suikervereniging van Suid-Afrika (Sasa). Die EU het sy subsidiëring van suikerbeetproduksie dramaties verlaag en voer nou nie meer 6 miljoen ton suiker per jaar uit nie, maar voer 3 miljoen ton in, luidens ’n berig van Allafrica.
Die beleidsverandering baan die weg vir lande in Afrika, langs die Stille Oseaan en ook Karibiese lande om suiker sonder kwotas en tariewe na die EU uit te voer, sê Sasa. Mnr. Johann van der Merwe van dié organisasie sê Suid-Afrika sal nie dadelik deur die verandering bevoordeel word nie, maar voeg by dat die Regering toegang tot die EU-mark probeer bekom deur ’n ekonomiese venootskapsooreenkoms.
Hy sê daar sal ná 2015 geen beperkinge op suikerinvoer in die EU wees nie, wat ’n “massiewe uitwerking” op suikerproduksie in ontwikkelende lande sal hê. Suid-Afrika kan sedert 1994 nie kwota- en tariefvrye suiker na die EU uitvoer nie weens die uitsluiting van sy vennote in die Suider-Afrikaanse Ontwikkelingsgemeenskap uit die ooreenkoms.
Bron:
19 Oktober 2009
