Transnet se beperkte vermoë om graan per trein te vervoer lei tot hoër kospryse, sê mnr. Jannie de Villiers, uitvoerende direkteur van die Nasionale Meulenaarskamer.
Die graanbedryf sê dat dié maatskappy se afdeling vir spoorvervoer, Transnet Freight Rail, wat voorheen as Spoornet bekend was, verskaf nie genoeg treine om koring van hawens en silo's na meulens te vervoer nie. De Villiers sê dat meulenaars en handelaars nou graan per trok moet aanry, wat sowat 30% duurder is as per spoor.
Dié koste word aan produsente oorgedra wat duurder kospryse tot gevolg het. Hy voeg ook by dat Transnet die infrastruktuur rondom spoorvervoer by silo's en hawens laat verval het.
Suid-Afrika se groeiende afhanklikheid van ingevoerde voedsel het dié probleem in die kollig geplaas. Transnet verskaf tans net sowat 20% van die nodige vermoët en "daar is 'n ernstige agteruitgang in diensverskaffing en infrastruktuur," sê De Villiers.
Hy meen ook dat Transnet graanvervoer as 'n "logistieke nagmerrie" bejeën weens die onvoorspelbaarheid van dié bedryf se langtermynbehoeftes wat deur veranderende weerpatrone beïnvloed word. "Hulle sê hulle hou nie daarvan om graan te vervoer nie, maar hulle het 'n maatskaplike verantwoordelikheid teenoor die land."
Bron:
The Cape Argus
14 November 2008
