Die jaarlikse E-Cape Hunter’s Fair vind vanaf 26 tot 28 Mei by die bekende Mentorskraal-konferensiesentrum buite Jeffreysbaai plaas.
Die Oos-Kaap is die tuiste van meer aktiewe jagters per kapita as enige ander provinsie in die land.
Met 'n toenemende aantal jagplase en billike pryse vir wild, het dié provinsie in een van SA se gewildste jagbestemmings ontwikkel.
Met bykans 60 uitstallers wat die voorste handelsmerke in die vuurwapenbedryf verteenwoordig, asook onder meer jagtoerusting, jagbestemmings, mesmakers en voertuie, sal 'n wye verskeidenheid nuwe produkte te sien wees. Baie sal teen afslagpryse beskikbaar wees, wat die ideale geleentheid bied vir winskopies.
Wen!
Die daaglikse gelukkige trekking sal 'n groot trekpleiser wees. 'n Besoeker se ingangskaartjie sal getrek word om 'n jaggeweer te wen. Een van die gewere moet elke dag van die skou gewen word en daar sal ook ander gelukkige trekkings wees met 'n verskeidenheid pryse soos teleskope and skiettoerusting.
Behalwe vir die stalletjies binne die uitstalsale, is daar verskeie buite-aktiwiteite wat kenmerkend van 'n tradisionele jagtersportdag is. Dit sluit in kleiduifskiet, .22-ghongskiet en verskeie demonstrasies insluitend herlaai en vleisverwerking.
Een van die gewildste skietkompetisies gaan die Peregrine-ghongskiet wees, waar deelnemers sal meeding om 'n geweer te wen. Skuts kan óf hul eie gewere met ammunisie wat met Peregrine-punte gelaai is, of 'n geweer met ammunisie wat deur Peregrine voorsien word, gebruik.
Fasiliteite
Mentorskraal het uitgebreide moderne fasiliteite met genoeg veilige parkering en groot binnenshuise sale wat uitstallers en besoekers teen gure weer beskerm. 'n Verskeidenheid van kos en drank sal bedien word, met 'n biertent en buiteluggeriewe waar besoekers kan ontspan.
Besoekers en enigiemand wat belangstel om by E-Cape Hunter’s Fair uit te stal, kan die webtuiste besoek by http://www.huntex-ecape.net/.
Toegang is R100, insluitend veilige parkering. Lede van geakkrediteerde jagverenigings en studente betaal R50. Kinders onder 10 kry gratis toegang. Kaartjies kan aanlyn op die webtuiste gekoop word, of by die hek.
Vir meer inligting skakel Deon Erasmus by 0825523319 of Adriaan Woudstra by 0833839417.
