In ’n era met ’n oormaat inligting beskikbaar deur sosialemedia-“kundiges” is dit ’n kuns om die kaf van die koring te skei. Praat min, luister baie, sorg dat jy weet wat in jou boerdery aangaan en kyk mooi na jou mense, is Louis Meyer, eienaar van Loriza Brahmane, se benadering wat aan hom voortgesette sukses en vooruitgang besorg.
Louis woon naby Lichtenburg, maar het ook boerderybelange by Nietverdiend, Zeerust en Mosselbaai. “Die belangrikste dinge sal in die toekoms gaan oor naspeurbaarheid waarvoor standaardbedryfsprosedures neergepen moet word, die vermoë om ingelig te bly oor wat jy nodig het, en te weet wat jy kan bekostig.”
Bly ingelig. Moenie oor iets praat waarvan jy niks weet nie. Baie jong mense maak daardie fout. Klim eerder oor die kraalmuur, weeg jou beeste en verkry só akkurate syfers. Kyk hoe gou ’n kalf opstaan en aan sy ma drink nadat hy gebore is. Maak seker die koei het genoeg melk om die kalf groot te maak. Weeg die kalf gereeld om sy groeiproses te monitor. Só leer jy jou beeste ken.
