Die Cathkin-vallei in die sentrale Drakensberggebied in KwaZulu-Natal is skilderagtig, maar het besondere struikelblokke wat gewasproduksie betref. Die Mopona-boerdery het byvoorbeeld 13 verskillende grondtipes oor die sowat 490 ha van sy bewerkbare lande wat besit en gehuur word.
Omdat dit boonop naby die voet van die Drakensberg is, kry die plaas gereeld talle bewolkte dae met gevolglike verminderde sonstraling en hitte-eenhede.
Ondanks hierdie en ander struikelblokke het die pa-en-seun-span mnre. William en Bruce Gibbings, wat Mopona besit en bestuur, ’n wenmielie-opbrengs van 15,8 t/ha (ná sif en vogaftrekkings tot die 12,5%-standaard) in die KZN-streek se droëlandkategorie van die Groei vir Goud-kompetisie behaal.
