Vir Rick Clark het dit nog nooit oor opbrengs gegaan nie. Eerder oor wins. “Boet ek op opbrengs in met die manier hoe ek boer?” vra die vyfdegeslag- Amerikaanse boer die gehoor op Reitz.
“Ja. Beslis. Elke dag!” Maar dit beteken nie hy maak nie geld nie. Soos beesboere al geleer het om eerder kilogram vleis per hektaar geproduseer as individuele diere se produksie te meet, of mielieboere wat kyk na kilogram mielies per millimeter reën, gaan dit vir Rick oor die geld wat hy bank, nie oor peperduur spogopbrengste nie.
Al sy kontakgewasse, soos mielies, sojabone en koring, word in multispesie-dekgewasse (winter en somer) geplant. Pleks daarvan dat die dekgewas doodgespuit word, word ’n roller gebruik om die plante te kneus (roller crimp). Rick plant die kontantgewas dan direk in die groenmateriaal.
