Herlewings- en volhoubare boerderypraktyke behoort oor meer te gaan as net om koste te verminder, opbrengste te verhoog en winsgewender te wees. Dit is belangrike doelwitte, maar moet gelyktydig bereik word met moreel en eties verantwoordelike praktyke en met die gesondheid van die boer, die boer se familie, sy werknemers en die res van die wêreld alles in gedagte.
Dit is die siening van mnr. Rick Clark, veelbekroonde en vyfdegeslag- Amerikaanse boer. Hy is die hoofspreker op die konferensie.
Clark sê hy is al geruime tyd ’n suksesvolle geenbewerkingsboer en sy sowat 2 800 ha grond en winsgewendheid het beslis daarby baat gevind. Hy het egter sowat tien jaar gelede besluit om nog meer in pas met die natuur se prosesse te werk. Dit het hom die afgelope nege jaar in staat gestel om grootliks nie meer chemiese kunsmis, saadbehandeling, swamdoders, onkruiddoders en plaagdoders te gebruik nie. Ten spyte hiervan bly sy plaas naby Williamsport, Indiana, produktief en winsgewend.
“Ek het verskeie fundamentele beginsels by my spesifieke produksietoestande aangepas. Dit is beslis nie maklik nie, maar ek hou rekord van wat werk en wat nie, en of my prosesse ’n gunstige of ongunstige neiging toon. Dan weet ek of ek op die regte pad is. Ek gebruik byvoorbeeld verskillende mengsels van dekgewasse op verskillende tye en om verskillende redes, soos om onkruid te bekamp of om die vrye stikstof en koolstof wat oral om ons in die atmosfeer is, neer te lê.”
Hy voeg by dat boere nie rekordopbrengste moet najaag ten koste van omgewings- en maatskaplike beginsels nie. Hulle moet eerder mik na konsekwente, volhoubare en winsgewende opbrengste wat nie in stryd is met hierdie beginsels nie.
“As jy nie ongemaklik is met wat jy doen nie, dan probeer jy nie hard genoeg om te verander nie. Benut die tyd en geleentheid wat jy in hierdie lewe oor het,” gaan Clark voort. “Ek is trots daarop om ’n boer te wees, maar ek is meer trots op die manier waarop ek boer.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
