Alte dikwels word hopeloos te vinnig en onnodig gespuit, sonder inagneming van die bydrae wat roofinsekte van nature lewer, het Johnnie, van die Noordwes-universiteit op die jaarlikse bewaringslandboukonferensie van Ottosdal se geenbewerkingsklub gesê.
“Ons vergeet enige bevolking, of dit nou mense of insekte is, beweeg op en af. Wanneer dit by plantbeskerming kom, wil ons voorkom dat ’n insekbevolking op plante ’n ekonomiese drempelwaarde oorsteek. Eers dán moet opgetree word. As biodiversiteit in plante en insekte met bewaringslandboupraktyke verhoog word, word plaagbevolkings gratis op ’n land onderdruk en bestry (grafiek bo).
“Ons besef nie die enorme biomassa van insekte op een hektaar mielies nie. Waar bewerking tot die minimum beperk word, leef daar tienduisende liewenheersbesies, waarvan een tot 70 plantluise per dag kan vreet, om nie eens te praat van hoeveel rooi spinmyte daar op besproeiingsmielies is nie.
