Puttergill Goldwyn Sweetie van Puttergill Holsteins in die Oos-Kaap het ‘n nuwe rekord opgestel deur vir die derde agtereenvolgende jaar die suiwelkampioenskap te wen. Sy is by die Agri-Expo Livestock op Sandringham as die FNB Suiwelkoningin gekroon.
Mnr. Brett Puttergill van Puttergill Holsteins sê hul deelname in die skou is een van die hoogtepunte van hul jaar. “Ons is geseënd om drie agtereenvolgende jare met dieselfde koei te wen en dit maak hierdie skou vir ons baie spesiaal”, sê Puttergill.
Die hele Puttergill-familie is betrokke by die besigheid. “Om deel te wees van die skou is baie verrykend vir ons kinders en het hulle geïnspireer om in die boerdery betrokke te raak. Een van my dogters gaan volgende jaar landbou studeer.”
Agri-Expo LivestockAgri-Expo Livestock is gevestig as die mees gesogte vee-ekspo in Suid-Afrika en bied die grootste suiwel- en vleisbees-interras kampioenskappe aan. Dit is ook die enigste kampioenskap in die Wes-Kaap waar Ayrshire én Holsteins geskou word.
“FNB ondersteun uitnemendheid en die Suiwelkoningin is die top-toekenning vir suiwelrasse in Suid-Afrika en ook die hoogtepunt van die suiwel interraskampioenskappe”, sê mnr. Charl Sandenberg, FNB Streekhoof: Landbou Wes- en Oos-Kaap. FNB is een van die finansiële vennote van Agri-Expo Livestock en borg die FNB Suiwelkoningin.
Bedryf ervaar druk
Volgens Sandenberg bly die suiwelbedryf 'n baie belangrike sektor binne die landbou, hoewel die bedryf deurlopend druk ervaar in terme van insetkoste en ander faktore. Hierdie word bevestig deur die vlak van ondersteuning en aktiewe betrokkenheid by Agri-Expo Livestock deur die drie grootste suiwel telersgenootskappe in Suid-Afrika, nl. Holstein-, Ayrshire- en Jersey-telersgenootskappe. Meer as 20 ander telersgenootskappe ondersteun ook die ekspo.
Die suiwel interraskampioenskap is beoordeel deur Heman Duvenage, senior beoordelaar van alle vleisbees- en suiwel rasse in Suid-Afrika, sowel as twee internasionale beoordelaars, Harry Schuiling van Holland, wat deur Semex Suid-Afrika geborg is en Garnet Schellen van Kanada, wat deur die Ayrshire Telersgenootskap geborg is.
Foto-byskrif: Die FNB Suiwelkoningin (Puttergill Goldwyn Sweetie) met mnre. Brett Puttergill (Puttergill Holsteins), Grant Puttergill (Puttergill Holsteins), Johan Ehlers (HUB: Agri-Expo), Johan Beukes (Landboubestuurder: FNB) en Charl Sandenbergh (Streekhoof: Landbou Wes- en Oos-Kaap: FNB). Foto: Agri-Expo
