Dr. Philip Botha het die Prestigetoekenning vir sy lewenslange prestasie as wetenskaplike en sy bydrae tot die weidingswetenskap. Dr. Pieter Swanepoel het die toekenning ontvang vir die beste podiumaanbieding vir ’n referaat oor die waarde van organiese koolstof in die grond as indikator van die gehalte van aangeplante weiding.
Sy kollega, me. Janke van der Colf, het vir die tweede agtereenvolgende jaar die toekenning vir die beste plakkaat ontvang, en ook die Norman Rethman toekenning vir aangeplante weiding vir die beste podiumaanbieding in weidingswetenskap vir haar referaat oor die invloed van plantmetodes op die produksiepotensiaal van mengsels van meerjarige gras en klawer in kikoejoe. Me. Ilze Fourie (’n student) het die toekenning ontvang vir die beste aanbieding deur ’n jong wetenskaplike met haar referaat oor die produksiepotensiaal van lusern wat in kikoejoe oorgesaai word.
Die res van die span, naamlik me. Dalena Lombard, mnr. Brian Zulu en me. Malissa Murphy, het nuwe data oor grondgesondheid- en bestuur, evaluasie van plantspesies en kultivars, besproeiingsbestuur en weidingsbestuurspraktyke tydens podium- en plakkaataanbiedinge bekendgemaak.
Volgens me. Annelene Swanepoel, wetenskaplike bestuurder van die direktoraat plantwetenskap van die Wes-Kaapse departement van landbou, is die navorsingspan van Outeniqua deel van een van die vlagskip-navorsingsprogramme van die departement en vorm dit die ruggraat van weidingsnavorsing vir melkproduksie in die provinsie en die land.
“Die span verdien al die eerbewyse, veral as jy hul navorsingsproduktiwiteit in gedagte hou en hul groot toewyding tot dienslewering aan die bedryf.”
