Die Joburg-mark (voormalig die Johannesburgse Varsproduktemark) het sy deure oopgemaak vir ’n groep studentesjefs van Gauteng om hulle kennis rondom die waardeketting vir vars produkte uit te bou.
Luidens ’n mediaverklaring was dit vir party van die leerlingsjefs hul eerste blootstelling aan ’n varsproduktemark en was hulle gefassineer met die prosesse rondom prysbepaling, die rypmaakproses en die bronne van plaaslike produkte.
“Die leerlingsjefs wat ons vergesel het het baie daarin belang gestel om meer oor die agtergrondprosesse waarvan hulle voorheen so min geweet het. Ons wou nie net die studente met hul plaaslike varsproduktemark vergewis nie, maar bou nou al verhoudings met hulle sodat hulle gemaklik daarmee sal wees om later, wanneer hulle gekwalifiseer is, hul produkte persoonlik te kom kies. Dít is ’n bemagtigende aktiwiteit vir sjefs, wat produkte wil geruik waarvan die bron en gehalte bekend is,” sê mnr. Jaco Oosthuizen, besturende direkteur by die RSA-groep.
Die markbesoeke is goed bygewoon met 55 studente van Capsicum Boksburg, 12 studente van die FBI Sjefskool en Patisserie-akademie en nege student van die Swiss Hotelskool wat oor verskeie dae die toer meegemaak het.
Die RSA-groep beoog om volgende jaar nog leerlingsjefs uit te nooi om die mark te besoek en beplan om die inisiatief ook na Kaapstad uit brei. Besoek www.rsa.co.za vir meer inligting.
