Klein Karoo Internasionaal (KKI) se herstrukturering het tot gevolg dat die Exotan-leerlooiery in Port Elizabeth einde vandeesmaand sy looiery-afdeling se deure sluit. Dit is ekonomies sinvol om te konsolideer as gevolg van die groot looiery-infrastruktuurkapasiteit binne die KKI,” sê mnr. Johan Stumpf, besturende direkteur.
Exotan het met die verwerking van volstruis-, buffel-, krokodil-, olifant- en seekoeileer internasionale bekendheid verwerf. “Al dié produkte en verwante navorsing sal op Oudtshoorn voortgaan.” Die aantal volstruise wat aan Exotan toegewys is, sal steeds op Graaff-Reinet geslag word en die betrokke velle sal by die KKI se looiery op Oudtshoorn verwerk word.
Mnr. Coenie Louw, hoofbestuurder van menslike hulpbronne, sê 66 werkers word deur die sluiting van die looiery geraak. Die werkers word vandag (31 Augustus) formeel afgelê.
“Daar word voorsien dat sommige van die afgelegde personeel weer gekontrakteer kan word vir die voltooiing van spesifieke take ná die einde van die maand,” sê Louw.
31 Augustus 2009
