Die KWV se besluit om sy druiwesapkonsentraat-aanleg in Upington aan Oranjerivier Wynkelders (OWK) te verkoop klop met sy strategie om op die bemarking van handelsmerke in alkoholiese drankies te fokus. Dié aanleg sal op 1 September as ‘n lopende saak oorgedra word na OWK.
Die transaksie beloop R70 miljoen. OWK en die KWV is reeds vennote en oor die afgelope paar jaar was die eersgenoemde die enigste voorsiener van druiwesapkonsentraat aan die aanleg. Druiwesapkonsentraat is ‘n kommoditeitsproduk wat van die voorsiening van rou materiaal en internasionale markaanvraag afhanklik is. Dit help, byvoorbeeld, om surplus druiwe uit die wynbedryf te verwyder voor jare van oorproduksie.
“KWV se strategiese fokus is op handelsmerke en verbruikers en hoewel ons altyd trots was om druiwesapkonsentraat as ‘n nie-alkoholiese produk in ons portefeulje te hê, glo ons dat OWK in ‘n beter posisie is om ons huidige kliënte aan te hou bedien,” sê mnr. Thys Loubser, KWV se hoof uitvoerende beampte.
Mnr. Thys Loubser van KWV verskyn op die meegaande foto.
Foto: www.kwv.co.za
24 Julie 2009
