OVK, die Rooivleisprodusente-organisasie in die Vrystaat (VSRPO) en Vrystaat Landbou (VL) asook Wepener se landbouvereniging het bygedra tot die projek Feed A Child met die uitdeel van worsbroodjies met allerhande lekkernye.
Ingevolge die projek word tot 500 kinders drie keer per week gevoed. Dit is in 1988 deur me. Bettie Meiring en haar seun, Johan, begin in ’n poging om die vlak van armoede in hulle gemeenskap te verlig. Die meeste van die kinders wat ondersteun word, is weeskinders, of kinders van enkel-ouers en wat deur hul grootouers grootgemaak word. Talle van die kinders is glo in Lesotho gebore en kom nie vir staatshulp in aanmerking nie.
OVK se steun aan die projek sedert Julie 2014 behels onder meer hulp met die bedryf van nege tonnels waarvolgens die kinders geleer word om hulle eie groente te kweek. “Dit verskaf aan ons groot vreugde om te help dat ’n behoorlike maaltyd aan ’n honger kind verskaf word,” sê mnr. Manie Botha, voorsitter van die OVK-direksie . “Die glimlagte is meer as genoeg belonging vir ons. Ek wil ook graag die vrywilligers wat so hard werk om na die kinders om te sien, lof toeswaai.”
Mnr. Neels de Villiers, voorsitter van die VSRPO, sê voedselsekerheid en die welstand van landelike gemeenskappe is aspekte waarna landbouers en die totale bedryf op ’n daaglikse basis omsien. “Ons wil ook graag die kinders aan rooivleis blootstel, want dis ons produk en ons trots.”
Mnr. Henk Vermeulen, hoofbestuurder van VL, sê die provinsie se landbouers gee so maklik ten spyte van moeilike seisoene en onsekerhede, omdat baie van hulle swaarkry ken en dus wil help. Roelf Jacobs, voorsitter van VL se maatskaplike komitee, sê kinders het liefde, aanvaardiging en kos in die maag nodig. “As ons op ’n dag soos hierdie een of al drie van die aspekte kan help vervul, maak ons ’n verskil in ’n kind se lewe.”
Skakel gerus 051 583 1889 vir meer inligting oor die Feed a Child-projek.
