Die agtste episode van die nuwe seisoen van Nasie in Gesprek, die landbou-gespreksprogram wat die nasie aan die praat het, kyk na die groentebedryf wat konstant aan die verander is waar jy vandag groenteprodukte by legio supermarkte kan aankoop. Maar wie van ons koop nog regtig groente by die varsproduktemark of by die informele verkopers langs die pad?
Hierdie keer gaan kuier die kamera in die Noordwes-provinsie wat bekend staan as die erfenisbestemming van Suid-Afrika. Hier word spesifiek by Hartbeespoort ingeloer met natuurlik die majestuese dam. In die “Kontrei” segment kyk ons na die aantreklikhede en aktiwiteite soos seilplankry, seiljagvaart en ander lekker pretaktiwiteite op die dam. Het jy geweet dat die dam reeds in 1925 gebou is en 205 miljoen kubieke meter water kan hou; en as die dam vol, is die oewer ‘n hele 56 km lank?
Dan maak die program ook ‘n draai by die 2016 Agri Noordwes Jongboer van die Jaar, John Griffiths, waar dié besproeiingsboer nege gewasse produseer. Om jou redelik uit die veld te slaan, lewer hulle 10 000 koolkoppe asook 12 000 bossies spinasie per dag. Hoe klein voel jou groentetuin nie nou nie!
Wortels maak opslae
Landbouweekblad se redakteur, Chris Burgess, gesels in “In Konteks” met aanbieder, Rozanne McKenzie, onder andere oor hoe wortels deesdae groot opslae maak omdat dit vanweë toenemende meganisasie baie goedkoper geproduseer kan word as in die verlede. Chris vertel ook ons meer oor die neiging na veral groentesappe in Suid-Afrika.
Ons maak ook ‘n draai by die Varsproduktemark in Johannesburg. ‘n Interessante statistiek is dat jaarliks tussen drie en vier miljard kilogram groente deur markte in Suid-Afrika versprei word.
Die bestuurder van die Produce Marketing Association, me. Lindie Stroebel, gesels met mede-aanbieder van die program, Theo Vorster. Sy verduidelik hoe belangrik jy as die verbruiker is en hoe jou koopgedrag jou beursie op die end van die dag raak. Net ‘n voorbeeld, jy kan vandag 2,5 kg druiwe by die varsproduktemark aankoop vir omtrent dieselfde prys as wat jy in die supermark vir 250 gram druiwe betaal. Dit laat jou beslis weer dink!
As jy dalk die program misgeloop het, kan jy dit aanlyn hier kyk.
Nasie in Gesprek – Met trots geborg deur Monsanto, Nedbank en Senwes, in samewerking met Hinterland, NWK en AFGRI.
Besoek die Nasie in Gesprek webtuiste by www.nasieingesprek.co.za en laai die toep by die app-winkel af vir al die uitsaaiskedules, tye en kanale waarop die episodes uitgesaai word. Moet ook nie vergeet dat jy via die Nasie in Gesprek-toep by die gesprek kan aansluit.
